- தினம் ஒரு பாடல்
- Daily a Tamil Song to enlighten the mind and refresh life
"கெட்டும் பட்டணம் சேர்" என்று ஒரு வழக்கு உண்டு. கிராமங்களில் வாழ்பவர்கள் வருவாய் குறைந்து வாழ்க்கை வாழத் தேவையான அடிப்படை வசதிகளையும் பெற முடியாத நிலையடைகையில் நகரங்களில் குடியேறி வாழ வழி தேடிக் கொள்வது ஆண்டாண்டுகளாக நடைமுறையில் இருந்து வருகிறது.
அத்தகைய பட்டணங்களில் வாழும் மக்கள் பலர் மக்கட்பண்பைக் கடைபிடிக்காமல் தவறான வாழ்க்கை முறையைப் பின்பற்றுவதால் அனைவருக்கும் துன்பம் நேர்கிறது. அளவுக்கு அதிகமான மக்கட்தொகையினாலும் விலைவாசி நாளுக்கு நாள் விஷம் போல் ஏறுவதாலும் அவ்வாறு பட்டணங்களில் பிழைப்புத் தேடி வருவோரில் பலர் உழைத்தும் போதிய ஊதியம் கிடைக்காத நிலையில் தெருவோரங்களிலும் பிற ஒதுக்குப்புறங்களிலும் வாழ வேண்டிய நிர்ப்பந்தத்துக்குள்ளாகின்றனர்.
"சென்னை மாநகரம் முன்னாளில் மெட்ராஸ் என ஆங்கிலேயர்களால் அழைக்கப்பட்டது. சுதந்திரத்துக்குப் பின்னரும் சென்னை நகரை மெட்ராஸ் என்றும் தமிழ்நாட்டை மெட்ராஸ் மாகாணம் என்றும் பல்லாண்டு காலம் அழைத்து வந்துள்ளனர் நம் அரசுகளும் பிற மக்களும்.
அத்தகைய மெட்ராஸ் நகருக்கு எதேச்சையாக வரும் தூத்துக்குடியைச் சேர்ந்த ஒரு வாலிபர் சென்னை நகரின் வாழ்க்கை முறையைத் தன் கண்ணோட்டத்தில் வேடிக்கையாக எடுத்துரைக்கும் விதமாக அமைந்த பாடல் ஒன்று:
கேட்டு மகிழ: மெட்ராஸ் நல்ல மெட்ராஸ்
திரைப்படம்: அனுபவி ராஜா அனுபவி -
நடித்தவர்கள்: முத்துராமன், ராஜஸ்ரீ, நாகேஷ், மனோரமா, மேஜர் சுந்தரராஜன்
பாடியவர்கள்: T.M. சௌந்தரராஜன்
மெட்ராஸ் நல்ல மெட்ராஸ் மெட்ராஸ் நல்ல மெட்ராஸ்
மெதுவாப் போறவுக யாருமில்லே இங்கே
சரியாத் தமிழ் பேச ஆளுமில்லே
ஆம்பிள்ளைக்கும் பொம்பிள்ளைக்கும் வித்யாசம் தோணல்லே
அநியாயம் ஆத்தாடியோ
மெட்ராஸ் நல்ல மெட்ராஸ் மெட்ராஸ் நல்ல மெட்ராஸ்
சீட்டுக்கட்டுக் கணக்காக இங்கே வீட்டக் கட்டி இருக்காக
வீட்டக் கட்டி இருந்தாலும் சிலர் ரோட்டு மேலே படுக்காக
பட்டணத்துத் தெருக்களிலே ஆளு நிக்க ஒரு நிழலில்லையே
வெட்டவெளி நிலமில்லையே நெல்லுக் கொட்ட ஒரு இடமில்லையே
அடி சக்கே
வைக்கேலாலே கன்னுக் குட்டி மாடு எப்போ போட்டுது
கக்கத்திலே தூக்கி வச்சாக் கத்தலையே என்னது
ரொக்கத்துக்கு மதிப்பில்லையே - இங்கு
வெக்கத்துக்கு விலையில்லையே
மெட்ராஸ் நல்ல மெட்ராஸ் மெட்ராஸ் நல்ல மெட்ராஸ்
ஊரு கெட்டுப் போனதுக்கு மூரு மாருக்கெட்டு அடையாளம்
நாடு கெட்டுப் போனதுக்கு மெட்ராஸு நாகரிகம் அடையாளம்
தேராட்டம் காரினிலே ரொம்பத் திமிரோடு போறவரே - எங்க
ஏரோட்டம் நின்னு போனா உங்க காரு ஓட்டம் என்னவாகும்?
ஹேஹே
காத்து வாங்க பீச்சுப் பக்கம் காத்து நிக்கும் கூட்டமே
நேத்து வாங்கிப் போன காத்து என்ன ஆச்சு வூட்டிலே
கெட்டுப்போன புள்ளிகளா வாழப் பட்டணத்தில் வந்தீகளா?
மெட்ராஸ் நல்ல மெட்ராஸ் மெட்ராஸ் நல்ல மெட்ராஸ்
அடி ஆத்தாடியோ